زجلياتي المغربية
(الخيط الخامس)
حروف الزيـن
***
الحاء حرف، والكلمة زينة الأوصاف
إذا غاب الزين .. تيبقاوا حروفه
بسمة تعانق نسمة ..
يا من غاب عليه راس الخيط في صوفه
هذه الحياة ...
في سما فسيحة .. وشمة على الجبين
يحضنها القلب .. في العين هي دموع الفرحة
شجرة خضرة ..
تحت نور القمرة ...
سهرانة اوراقها .. بالهمس تتحاكا
تناجي نجمة في سماها
تتأمل زرقة .. تسلب الأنظار
في ماها ..
هذه حبة نقية في ثراها
وفي الصباح تتفتح زهرة جميلة في بهاها
هذه نحلة .. تحوم حداها
هذا طير .. من فوق يعشق نداها
الأيام من قديم .. حدودة وسباتة
تجري برجلين ثلاثة
ماضي فات، وحاضر، وآت ...
حتى حد فينا .. ما هو مخلد ولا غدي يبات ...
أحلام ابن آدم قدام تسعى
وحياته .. ما هي شراب ومرعى
الفياق بكري بالذهب مشري ..
وعى يا صاح وعى
تجربة وتنظيم .. صبر وصنعة
الشهد عزيز ...
والفوز به حرث وزريعة قبل الحصاد
وهذه ما هي بدعة
النجم مدروك بقوة العزيمة ...
ولو يكون في سابع سماء
أو يكون في قلعة ...
والجبال تريب بالإرادة والثبات
تسقط على السهل صرعى ...
الفوضى .. حتى لين
قال وقيل .. قبيحة هاذ الصنعة
خلي ذاك الجمل راقد
خلي الطبق مستور ...
خلي الزمان يدور
مزينه كلام هذا ...
بكري شراوا الناس وتباعت السلعة
خلي الهم واحد ...
خلي النجمة ساكنة في الديجور
خليك صايم واسمح في الفطور ..
نسى وحيد من بالك حتى السحور ...
مزينه رأي هذا .. بكري تبنى الساس
وبكري طلعات الصمعة
حتى لين هاذ الجمل راقد ..؟
وانت عليه شاهد ..
حتى لين هاذ الطبق مستور ..؟
وانت حامله فوق راسك .. مثقل به وساير تدور
حتى لين وانت هايم ...
واقف في مكانك .. مسمر سور ..؟
وإذا كان الهم واحد ..
حتى لين وانت فيه مقبور ..؟
وذيك النجمة .. حتى لين وهي في الديجور
ساير تنظر لها بعين ميتة ..
وعقل شارد في بحور ...
الله غالب الصاحب .. هذا زمان
حفرة تنسيك في حفرة ..
وألف بير وبير .. ياحسرة
هذه ايام كثرة الزحام وقلة الإدام
هاذي ايام شلا هموم وتخمام ...
وفرحة في القلب وحدة
والحزن توام ...
هذه ايام السيبة والريبة
واقدام تسحق النعناع والشيبة ..
وحيتان تقطع سلاسل
وتشدها سبيبة ...
***د. عبد الفتاح أفكوح - أبو شامة المغربي
[ندعوك للتسجيل في المنتدى أو التعريف بنفسك لمعاينة هذا الرابط]